| Новости » Слово автору | ||
| Зөлфәт Ҡәһәрләнгән ике ҡош шикелле, Беҙ осабыҙ таңға ҡәҙәрле. Ҡысҡырабыҙ: — Са-а-а-аҡ! — Су-у-у:-уҡ! Ҡауышыу юҡ. Тейҙе беҙгә кемдең ҡәһәре! Яңғыҙ ғына ергә килмәй кеше, Йән йәндәше менән ярала. «Йәндәремдең яртыһы!..» — тип юҡҡа Әйтмәйҙәрҙер — Тәҡдир арала… Күрһәт миңә, тәҡдир, ғүмеремдә Мин асырға тейеш йондоҙҙо! Йондоҙ ҡабыҙырға тейешмендер, Ә мин бына — шырпы ҡабыҙҙым… Шул йондоҙҙоң саҡырыуы йәшәй Һәр күңелдә — Һәм ул күңелдәр Гөлгә, бәлки, һыйынырға тейеш, Ә һыйына улар — тимергә. Йән менән Йән… Ҡара-ҡаршы осоп Үтер улар мең төн, мең көндө — Ҡарғалмаған, Ләкин мәңгелеккә Ҡауыша алмаҫ Саҡ-Соҡ шикелле Кем ҡарғаһын беҙҙе! Төнгө урман Ҡанаттарҙы йолҡа, ҡаната, Ҡанаттан ҡам тама — арабыҙҙа Һаман шул уҡ, шул уҡ таң ата! Ҡабат төнгә ҡыуа һине был таң, Төн ебәрмәй мине — нисә йыл Ҡәһәрләнгән ике ҡош шикелле, Беҙ осабыҙ һаман, осабыҙ. Умырзая шыта ҡар аҫтынан, Эйелә тал йәйге бәхетенән. Һалмаҡ яуым булып япраҡ яуа, Ҡыштар үтә урман өҫтөнән. …Ерҙең ҡайһы төбәгендә, бәхетем, Күҙәтәһең таңды тынлыҡта — Бына ошо мәлдә, ошо хәлдә, Миңә бик тә моңһоу минутта? Һуҡмаҡ эҙләйһеңме, йөҙәһеңме? Тораһыңмы кескәй пристандә Аҡ туфлиҙа, аҡ күлдәкле Ләкин Бик тә бәхетһеҙ бер дастандай? Тал баҫмала керҙәр сайҡайһыңмы, Йәки төнгө серле ҡалала Күнегәһеңме һин ят наҙҙарға Һәм күҙҙәрҙе йомоп йәшәргә? Ысҡынырға теләп тәҡдирҙәрҙең Ҡотолғоһоҙ тартыу көсөнән, Ауаз һалып, эҙләп, өҙгөләнеп Осаһыңмы ҡитға өҫтөнән? Ләкин ҡайҙа ҡына булһаң да һин, Япа-яңғыҙ ҡалған төнөңдә Күҙҙәреңде йом да, тыңла төндө — Нәҡ шул саҡта һинең күңелдә, Меңәр йыллыҡ көл ҡаплаған ерҙән Ҡалҡып сыҡҡан хәбәр шикелле, Йөрәгеңде ҡыҫып, ауырттырып Минең үлмәҫ һағыш ишетелер, Шул мәңгелек тауыш ишетелер: — Са-а-а-аҡ! — Су-у-у-уҡ! …Әүерелер ҡулдар пар ҡанатҡа… Йәшәү — осош, кеше — таң ҡошо. Кеше күңеле — Саҡ-Суҡ тауышылыр, Кеше йәне — Саҡ-Суҡ һағышы…
1976
|
||
| | Напечатать | Комментарии (0) | ||
| [22 февраля 2011] | Просмотров: 225 Опубликовал: admika | Оцени статью! |
Информация
Комментировать статьи на нашем сайте возможно только в течении 30 дней со дня публикации.
{allpages}
