“Сит илде маҡта ла, үҙ ереңдә йәшә” » Новости Уфы, главные новости Башкортостана / Bash-Portal.Ru

“Сит илде маҡта ла, үҙ ереңдә йәшә”

Бөгөн күптәр Американы, Бөйөк Британияны, ғөмүмән, сит илде күреү теләге менән янып йәшәй. Ә бына Салауат районы Малаяҙ башҡорт гимназияһының инглиз теле уҡытыусыһы Фәйрүзә Ғәлинаның был хыялы күптән түгел тормошҡа ашты ла инде. Ул ике аҙна “томанлы Альбион”да булып ҡайтты.

– Фәйрүзә Ғарифйән ҡыҙы, күптәр Англияға нисек барырға тип баш вата. Һеҙ нисек был илгә барып эләктегеҙ һуң?– ЮНЕСКО эштәре буйынса комитет был ойошманың дуҫтары клубы етәкселәренә, сит телдәр уҡытыусыларына, студенттарға һәм өлкән класс уҡыусыларына Франция, Германия, Англияға барырға тәҡдим итә. Мин, ЮНЕСКО дуҫтары клубы етәксеһе булараҡ, уларҙың тәҡдименә теләп ризалаштым, һәм “Өфө – Лондон: диалог һәм хеҙмәттәшлек” проекты менән Англияға барып ҡайттым.– Англияны күргәс, беренсе тәьҫораттарығыҙ ниндәй булды?– Иң беренсе Бөйөк Британияның иҫ киткес таҙалығы күҙгә салынды. Унда бер ҡайҙа ла сүп-сар, тәртипһеҙлек күрмәнек. Шулай уҡ был илдең йәшеллеккә күмелеп ултырыуы һоҡландырҙы. Бында ағастарҙың япраҡтары саҡ һарғая башлағайны.Лондон – күп мәҙәниәтле ҡала. Бында төрлө милләт вәкилдәре, төрлө халыҡ йәшәй. Беҙгә был сәйер тойолһа, аҙаҡтан өйрәндек.– Сәфәрегеҙҙең төп маҡсаты нимә булды?– Әлбиттә, проект буйынса төп маҡсат – уҡыу, инглиз теленән белемде камиллаштырыу. Әммә беҙ ике ҡуянды бергә тоттоҡ. Төшкә тиклем уҡыһаҡ, төштән һуң экскурсияға йөрөнөк. 25 кешенән торған төркөм менән Трафальгар майҙанына, Милли галереяға, Британия, Фән, тәбиғәт белеме тарихы музейҙарына, Гайдпаркка һәм Стоунхенджға барҙыҡ. – Инглиздәр беҙҙекеләрҙән нимәһе менән айырыла?– Улар бик итәғәтле, һаҡсыл, тупаҫ түгелдәр. “Ғәфү итегеҙ, рәхмәт, зинһар өсөн” һүҙҙәрен йәлләмәйҙәр, аҙым һайын әйтәләр. Шулай уҡ улар тәбиғәткә бик һаҡсыл ҡарашта, сүп-сарҙы теләһә ҡайҙа ташламай, ҡалдыҡтарҙы махсус урналарға төрөн төргә айырып йыялар.– Һеҙҙе ҡайҙа урынлаштырҙылар?– Төркөмдәге һәр ике кешене Англияла йәшәгән ғаиләгә урынлаштырҙылар. Мин Хопкинс фамилиялы ғаиләлә йәшәнем. Беҙҙе бик яҡшы ҡаршы алдылар. Ике аҙна эсендә улар менән дуҫлашып та өлгөрҙөк. Бигерәк тә хужабикә менән тиҙ уртаҡ тел таптыҡ. Ул уҡытыусы ярҙамсыһы булып эшләй. Шуға ла икебеҙгә лә яҡын һөнәр, уртаҡ тема яҡынайтҡандыр, тип уйлайым. – Англияла ҡалырға мөмкинлек булһа, унда йәшәр инегеҙме?– Англия ҙур-ҙур биналары, иҫ киткес тәбиғәте, итәғәтле кешеләре, мәҙәниәте, йомшаҡ теле менән мине мәңгелеккә әсир итте. Әммә, нисек кенә булһа ла, тыуған төйәгем, тыуған тупрағым миңә ҡәҙерлерәк, һәм унан оҙаҡ ваҡытҡа айырылғым килмәй. Ҡаланы маҡта ла, ауылда йәшә, тип юҡҡа ғына әйтмәйҙәрҙер. Сит илгә барып күреп ҡайтыу, ә тыуған илеңдә йәшәү күпкә яҡшыраҡ, тип уйлайым.– Әңгәмәгеҙ өсөн рәхмәт.

Лиана Вәлиуллина.